Art. 960b Activas cun pretschs da martg observabels
1 En la valitaziun sequenta dastgan activas ch’èn quotadas a la bursa u che han in auter pretsch da martg observabel sin in martg activ, vegnir valitadas per il curs u per il pretsch da martg dal di da referenza da la bilantscha, er sche quest pretsch è pli aut che la valur nominala u che la valur d’acquisiziun. Tgi che fa diever da quest dretg, sto valitar tut las activas da las posiziuns correspundentas da la bilantscha, che han in pretsch da martg observabel, per il curs u per il pretsch da martg dal di da referenza da la bilantscha. En l’agiunta stoi vegnir rendì attent a questa valitaziun. Per las vaglias e per las ulteriuras activas, che han in pretsch da martg observabel, sto la valur totala da las activas correspundentas mintgamai vegnir inditgada separadamain.
2 Sche las activas vegnan valitadas per il curs da la bursa u per il pretsch da martg dal di da referenza da la bilantscha, dastga la valur vegnir rectifitgada sin donn e cust dal quint economic per tegnair quint da la fluctuaziun dals curs. Talas rectificaziuns da la valur n’èn dentant betg permessas, sch’i vegnissan uschia sutpassadas tant la valur d’acquisiziun sco er la valur da bursa, en cas che quella fiss pli bassa che la valur d’acquisiziun. L’import total da las reservas da fluctuaziun sto vegnir preschent separadamain en la bilantscha u en l’agiunta.
Es besteht kein Anspruch auf Aktualität und Vollständigkeit/Richtigkeit.
