CPS Art. 349c -

Einleitung zur Rechtsnorm CPS:

Art. 349c c. Communicaziun da datas da persunas ad in terz stadi u ad in organ internaziunal ⁽¹⁾

¹ Datas da persunas na dastgan betg vegnir communitgadas a l’autoritad cumpetenta d’in stadi che n’è betg colli cun la Svizra tras ina da las cunvegnas d’associaziun a la reglamentaziun da Schengen (terz stadi) u ad in organ internaziunal, sche quai periclitass gravantamain la persunalitad da la persuna pertutgada, en spezial perquai ch’i manca ina protecziun adequata.

² Ina protecziun adequata vegn garantida tras:

a. la legislaziun dal terz stadi, uschenavant che l’Uniun europeica ha constat quai tras in conclus;

b. in contract internaziunal;

c. garanzias specificas.

³ Sche l’autoritad che communitgescha las datas è in’autoritad federala, infurmescha ella l’Incumbens federal per la protecziun da datas e per la transparenza (IFPDT) davart las categorias da communicaziuns da datas da persunas che han lieu sin basa da garanzias specificas tenor l’alinea 2 litera c. Mintga communicaziun vegn documentada. ⁽²⁾

⁴ En divergenza da l’alinea 1 pon datas da persunas vegnir communitgadas a l’autoritad cumpetenta d’in terz stadi u ad in organ internaziunal, sche la communicaziun è necessaria en il cas singul:

a. per proteger la vita u l’integritad corporala da la persuna pertutgada u d’ina terza persuna;

b. per parar in privel smanatschant serius e direct per la segirezza publica d’in stadi da Schengen u d’in terz stadi;

c. per prevegnir, per constatar u per persequitar in malfatg, premess che nagins interess predominants degns da protecziun da la persuna pertutgada na s’opponian a la communicaziun;

d. per exequir u per far valair in dretg envers in’autoritad ch’è cumpetenta per prevegnir, per constatar u per persequitar in malfatg, premess che nagins interess predominants degns da protecziun da la persuna pertutgada na s’opponian a la communicaziun.

⁵ Sche l’autoritad che communitgescha las datas è in’autoritad federala, infurmescha ella il IFPDT ⁽³⁾ davart la communicaziun tenor l’alinea 4.

⁽¹⁾ Integr tras la cifra II 2 da la LF dals 28 da sett. 2018 davart la realisaziun da la directiva (UE) 2016/680 concernent la protecziun da persunas natiralas en connex cun l’elavuraziun da datas persunalas per la prevenziun, l’investigaziun, la scuvrida u la persecuziun da malfatgs u per l’execuziun penala, en vigur dapi il 1. da mars 2019 (AS 2019 625; BBl 2017 6941).
⁽²⁾ Versiun tenor la cifra II 26 da l’agiunta 1 da la LF dals 25 da sett. 2020 davart la protecziun da datas, en vigur dapi il 1. da sett. 2023 (AS 2022 491; BBl 2017 6941).
⁽³⁾ Expressiun tenor la cifra II 26 da l’agiunta 1 da la LF dals 25 da sett. 2020 davart la protecziun da datas, en vigur dapi il 1. da sett. 2023 (AS 2022 491; BBl 2017 6941). Questa midada è vegnida fatga en las disposiziuns numnadas en la AS.

Es besteht kein Anspruch auf Aktualität und Vollständigkeit/Richtigkeit.