DO Art. 973e -

Einleitung zur Rechtsnorm DO:

Art. 973e Effects ⁽¹⁾

¹ Il debitur d’in dretg da valur inscrit ha il dretg e l’obligaziun da prestar ses pajament mo al creditur cumprov en il register da dretgs da valur e mo sin basa d’ina adattaziun correspundenta dal register.

² Premess ch’i na saja betg avant maun ina malignadad u ina greva negligientscha da vart dal debitur, vegn el deliber , sch’el presta – il mument da la scadenza – in pajament a favur dal creditur cumprov en il register da dretgs da valur, er sch’il creditur cumprov n’è betg il creditur effectiv.

³ Tgi che ha acquist dal creditur cumprov en il register da dretgs da valur in dretg da valur inscrit en quest register, sto vegnir protegì en ses acquist, er sche l’alienader n’era betg autoris da disponer dal dretg, nun che l’acquistader haja agì da mala fai u per greva negligientscha il mument da l’acquist.

⁴ Cunter la pretensiun che sa basa sin in dretg da valur inscrit po il debitur mo far objecziuns:

1. ch’èn drizzadas cunter la valaivladad da la registraziun ubain resortan dal register da dretgs da valur u da sias datas accumpagnantas;

2. ch’el persunalmain po far valair envers il creditur actual dal dretg da valur inscrit; u

3. che sa basan sin la relaziun directa dal debitur cun in anteriur creditur dal dretg da valur inscrit, sch’il creditur actual ha agì sapientivamain a disfavur dal debitur a chaschun da l’acquist dal dretg da valur inscrit.

⁽¹⁾ Integr tras la cifra I 1 da la LF dals 25 da sett. 2020 davart l’adattaziun dal dretg federal als svilups da la tecnologia dals registers electronics distribuids, en vigur dapi il 1. da favr. 2021 (AS 2021 33; BBl 2020 233).

Es besteht kein Anspruch auf Aktualität und Vollständigkeit/Richtigkeit.