Art. 89 d. Nunsuccess dal temp d’emprova
1 Sche la persuna ch’è vegnida relaschada cundiziunadamain commetta in crim u in delict durant il temp d’emprova, ordinescha la dretgira ch’è stada cumpetenta per giuditgar l’emprim malfatg la reintegraziun.
2 Sch’ins na sto betg temair – malgr il crim u il delict commess durant il temp d’emprova – ch’il sentenzi commettia ulteriurs malfatgs, desista la dretgira da la reintegraziun. Ella po admonir il sentenzi u prolungar il temp d’emprova per maximalmain la mesadad da la durada che l’autoritad cumpetenta aveva fix oriundamain. Sche la prolungaziun vegn ordinada pir suenter ch’il temp d’emprova è scadì, cumenza ella il di da l’ordinaziun. Las disposiziuns davart l’assistenza da reabilitaziun e davart las directivas èn applitgablas (art. 93–95).
3 Sche la persuna ch’è vegnida relaschada cundiziunadamain sa sustira da l’assistenza da reabilitaziun u sch’ella cuntrafa a las directivas, è applitgabel l’artitgel 95 alineas 3–5.
4 La reintegraziun na dastga betg pli vegnir ordinada, sch’i èn passads 3 onns dapi ch’il temp d’emprova è scadì.
5 L’arrest d’inquisiziun ch’il delinquent ha expi durant la procedura da la reintegraziun sto vegnir mess a quint al rest dal chasti.
6 Sche las premissas per in chasti da detenziun nuncundiziun èn ademplidas sin basa dal nov malfatg e sche quest chasti coincida cun in chasti restant ch’è davent exequibel pervia da la revocaziun, furma la dretgira in chasti total en applicaziun da l’artitgel 49. Per quest chasti èn puspè applitgablas las reglas da la relaschada cundiziunada. Sch’i vegn exequì mo il chasti, è applitgabel l’artitgel 86 alineas 1–4.
7 Sch’in chasti restant ch’è davent exequibel pervia da la reintegraziun coincida cun l’execuziun d’ina mesira tenor ils artitgels 59–61, è applitgabel l’artitgel 57 alineas 2 e 3.
Es besteht kein Anspruch auf Aktualität und Vollständigkeit/Richtigkeit.
