Art. 60a (1) Prestaziun d’extrada u renta per vita duranta transferida pervia d’in divorzi
1 Sch’ina prestaziun d’extrada u ina renta per vita duranta è vegnida attribuida ad ina persuna pervia d’in divorzi e sch’ella na po betg depositar questa prestaziun d’extrada u questa renta per vita duranta en ina instituziun da provediment, po ella laschar transferir quella a l’instituziun auxiliara.
2 Sin dumonda da la persuna autorisada transfurma l’instituziun auxiliara il dabun augment en questa moda inclusiv ils tschains en ina renta. Quella po vegnir retratga il pli baud cur che la vegliadetgna minimala tenor il reglament da l’instituziun auxiliara è cuntanschida. Cas cuntrari è ella debitada cur che la vegliadetgna da renta tenor l’artitgel 13 alinea 1 è cuntanschida. La retratga po vegnir suspendida per maximalmain 5 onns, sche l’activitad da gudogn vegn cuntinuada. I n’exista nagin dretg da prestaziuns per survivents suenter la mort da la persuna autorisada.
3 L’instituziun auxiliara calculescha la renta sin basa da ses reglament.
4 L’artitgel 37 alinea 3 vala tenor il senn.
(1) Integr tras la cifra 4 da l’agiunta da la LF dals 19 da zer. 2015 (cumpensaziun dal provediment professiunal en cas da divorzi), en vigur dapi il 1. da schan. 2017 (AS 2016 2313; BBl 2013 4887).Es besteht kein Anspruch auf Aktualität und Vollständigkeit/Richtigkeit.
