LPP Art. 41 - Surannaziun da dretgs e conservaziun da documents da provediment

Einleitung zur Rechtsnorm LPP:

Art. 41 ⁽¹⁾ Surannaziun da dretgs e conservaziun da documents da provediment

¹ Ils dretgs da prestaziuns na suranneschan betg, sche las persunas assicuradas n’han betg bandun l’instituziun da provediment, cur ch’il cas d’assicuranza resulta.

² Pretensiuns sin contribuziuns e prestaziuns periodicas suranneschan suenter 5 onns, autras pretensiuns suenter 10 onns. Ils artitgels 129–142 DO ⁽²⁾ èn applitgabels.

³ Dabuns ch’èn deponids sin contos u sin polissas da libra circulaziun tenor l’artitgel 10 da l’Ordinaziun dals 3 d’october 1994 ⁽³⁾ davart la libra circulaziun vegnan transferids 10 onns suenter la vegliadetgna ordinaria da renta (art. 13) al fond da garanzia; quel als utilisescha per finanziar l’Uffizi central da la 2. pitga.

⁴ Sch’i n’è betg pussaivel d’eruir la data da naschientscha exacta da la persuna assicurada, vegnan ils dabuns da libra circulaziun, per ils quals las instituziuns che als administreschan n’han survegnì durant 10 onns naginas novitads da la persuna assicurada u da ses ertavels, administrads vinavant da questas instituziuns fin l’onn 2010. Suenter vegnan transferids er quests dabuns al fond da garanzia; quel als utilisescha tenor l’alinea 3.

⁵ Il fond da garanzia ademplescha pretensiuns sin dabuns ch’èn vegnids transferids ad el tenor ils alineas 3 e 4, uschenavant che lur existenza vegn cumprovada da la persuna assicurada u da ses ertavels.

⁶ Pretensiuns che na vegnan betg fatgas valair tenor l’alinea 5, suranneschan cur che la persuna assicurada ha cumplenì u avess cumplenì ses 100. onn da vegliadetgna.

⁷ Ils alineas 1–6 èn applitgabels er per obligaziuns che resultan da contracts tranter las instituziuns da provediment e las societads d’assicuranza ch’èn suttamessas a la surveglianza da las assicuranzas.

⁸ Il Cussegl federal decretescha disposiziuns davart la conservaziun da documents da provediment en vista al fatg che las persunas assicuradas fan valair lur dretgs.