LPP Art. 30d - Restituziun

Einleitung zur Rechtsnorm LPP:

Art. 30d Restituziun

¹ La persuna assicurada u ses ertavels ston restituir l’import retratg a l’instituziun da provediment, sche:

a. la proprietad d’abitar vegn alienada;

b. i vegnan concedids dretgs sin questa proprietad d’abitar, che correspundan economicamain ad in’alienaziun; u

c. i n’è da pajar nagina prestaziun da provediment tar la mort da la persuna assicurada.

² La persuna assicurada po dal rest restituir da tut temp l’import retratg, resguardond las cundiziuns da l’alinea 3.

³ La restituziun è admissibla fin:

a. ⁽¹⁾ al cumenzament dal dretg reglamentar sin prestaziuns da vegliadetgna;

b. a l’entrada d’in auter cas da provediment; u

c. al pajament da la prestaziun da libra circulaziun en daner blut.

⁴ Sche la persuna assicurada vul puspè investir entaifer 2 onns il retgav da l’alienaziun da la proprietad d’abitar en la dimensiun da la retratga anticipada per sia proprietad d’abitar, po ella transferir quest import ad ina instituziun da libra circulaziun.

⁵ Tar l’alienaziun da la proprietad d’abitar sa restrenscha l’obligaziun da restituziun al retgav. Sco retgav vala il pretsch da vendita, minus ils debits ipotecars e las taxas che vegnan adossadas al vendider tras lescha.

⁶ Imports restituids vegnan attribuids al dabun da vegliadetgna tenor l’artitgel 15 ed a l’ulteriur dabun da provediment en la medema relaziun sco tar la retratga anticipada. ⁽²⁾

⁽¹⁾ Versiun tenor la cifra II 2 da la LF dals 22 da mars 2019 (refurma da las prestaziuns supplementaras), en vigur dapi il 1. da schan. 2021 (AS 2020 585; BBl 2016 7465).
⁽²⁾ Versiun tenor la cifra 4 da l’agiunta da la LF dals 19 da zer. 2015 (cumpensaziun dal provediment professiunal en cas da divorzi), en vigur dapi il 1. da schan. 2017 (AS 2016 2313; BBl 2013 4887).

Es besteht kein Anspruch auf Aktualität und Vollständigkeit/Richtigkeit.